• socialize wit us:
Inkuru Irambuye

inkuru ya Jean de Dieu Murasira
Share Button

Mu mwambaro uranga imfungwa n'abagororwa mu Rwanda,Diane Rwigara yitabye urukiko mu bujurire

Diane Rwigara ushinjwa ibyaha birimo guteza imvururu muri rubanda no gukora no gukoresha impapuro mpimbano, yitabye Urukiko Rukuru kuri uyu wa Kabiri, mu iburanisha mu rwego rw’ubujurire ku ifungwa n’ifungurwa ry’agateganyo.
Nov 07 2017
31
Politiki

Kuwa 23 Ukwakira 2017 nibwo Urukiko Rwisumbuye rwa Nyarugenge rwategetse ko Diane Rwigara na nyina Mukangemanyi Adeline Rwigara, bahurira ku cyaha cyo kugambirira guteza imvururu cyangwa imidugararo muri rubanda, bafungwa iminsi 30 y’agateganyo, maze Anne Uwamahoro Rwigara bari bafunganywe ararekurwa.

Diane na Adeline Rwigara, bombi bajuririye Urukiko Rukuru bavuga ko hari ingingo Urukiko Rwisumbuye rwa Nyarugenge rutahaye agaciro ubwo rwemezaga ko bafungwa.

Me Buhuru Pierre Célestin wunganira Diane Rwigara ntiyagaragaye mu rukiko; Me Gatera Gashabana wunganira Mukangemanyi Adeline we aritaba, ariko uwo yunganira ntiyaza, ahubwo yandikiye urukiko ko arwaye, asaba ko bahabwa undi munsi wo kuburana.

Bitandukanye no mu iburanisha ryo mu Rukiko Rwisumbuye rwa Nyarugenge, Diane Rwigara yari yambaye impuzankano y’imfungwa, igitambaro yategaga mu mutwe ntiyagitega, ahubwo yogoshe umusatsi hasigaraho muke.

Mu bashinjacyaha kuri uyu munsi harimo Nkusi Faustin, usanzwe ari Umuvugizi w’Ubushinjacyaha na Mukunzi Faustin bafatanyije muri iri buranisha ryatangiye ahagana saa tatu.

Mushimiyimana Rwigara Diane yabwiye urukiko ko umwavoka we yagize urundi rubanza ndetse atari yamenye ko agomba kwitaba urukiko uyu munsi.

Yavuze ko yahawe urutonde rw’amazina y’abantu baburana uyu munsi harimo n’aye, atamenyeshejwe ko aza kuburana mu ibaruwa imuhamagaza mu rukiko “assignation”, bityo asaba ko yahabwa undi munsi wo kuburaniraho.

Me Gatera Gashabana wagaragaye mu rukiko uwo yunganira [Mukangemanyi] adahari, yabwiye urukiko ko atabashije kwitaba kubera uburwayi, nawe akomoza ku mpungenge z’uko batahamagajwe mu buryo bukwiye. Nawe yasabye ko bahabwa undi munsi wo kuburana kandi bakazahamagarwa hakurikijwe ibiteganywa n’itegeko.

Ubushinjacyaha bwavuze ko busanga kumenyeshwa ko uyu munsi bagomba kuburana byari bihagije ngo bitabe urukiko cyane ko aribo bajuriye.

Urukiko rwanzuye ko Me Gashabana adashobora kuburanira Mukangemanyi adahari kubera uburemere bw’ibyaha aregwa, ndetse ko Diane ataburana atunganiwe, maze urubanza rurasubikwa, rukazakomeza kuwa 16 Ugushyingo 2017.

Diane Rwigara n’umubyeyi we Mukangemanyi bashinjwa ibyaha bishingiye ahanini ku magambo bagiye bandikirana n’inshuti z’umuryango wabo kimwe n’amajwi bagiye bohererezanya kuri WhatsApp, ari nayo agize icyaha cyo kugambirira guteza imvururu n’icy’ivangura n’amacakubiri.

Ku cyaha cyo gukora no gukoresha impapuro mpimbano, gihera ku nyandiko Diane Rwigara yatanze muri Komisiyo y’Amatora ubwo yifuzaga guhatanira kuyobora igihugu, mu matora yabaye muri Kanama uyu mwaka.

Ubushinjacyaha buvuga ko hari imikono y’abo yavuze ko bamusinyiye nk’abamushyigikiye, bikaza kugaragara ko imikono ari imihimbano nk’uko byemejwe mu isuzumwa rya gihanga ryakorewe muri Kigali Forensic Laboratory.

Ubushinjacyaha kandi buvuga ko mu gihe cyo gusaka iwabo mu rugo, hari SIM Card zasanzwe kwa Diane zibaruye ku bandi bantu bari ku rutonde rw’abamusinyiye, bikongera amakenga ko ari izo yakoresheje abona imyirondoro yabo maze akisinyira mu mazina yabo.


Abavandimwe ba Diane Rwigara bari mu baje gukurikirana urubanza


Ibitekerezo Byatanzwe
tanga igitekerezo

Create Account



Log In Your Account